CAMPAMENTO URBANO DE VERÁN

A ALCALDESA DE VIVEIRO VISITA O CAMPAMENTO URBANO DE VERÁN, QUE FACILITA A CONCILIACIÓN E POTENCIA A CONVIVENCIA ENTRE OS NENOS

Viveiro, 4 de xullo de 2023. A alcaldesa de Viveiro, María Loureiro, visitou esta mañá o Campamento Urbano de Verán, un servizo que iniciou a súa prestación o pasado luns e se prolongará ata finais de agosto.

“Con este campamento buscamos favorecer a conciliación familiar. Deste modo, os cativos e cativas gozan dunha alternativa de ocio saudable e á vez que pedagóxica, na que se fomentan o xogo, o deporte e a expresión artística, ademais de valores como a convivencia ou o respecto entre iguais”, explica María Loureiro.

Ademais do campamento, no verán está aberta a escola infantil municipal e o concello colabora con outros clubes e entidades noutras actividades, como os cursos de ximnasia rítmica e outros deportes, cedendo as instalacións municipais.

O campamento de verán está destinado a nenos e nenas nados entre os anos 2011 e 2019, ambos incluídos, de luns a venres en horario de 08:30 a 14:15 horas, con entrada flexible ata as 10,00.

Ofértanse un total de 110 prazas co compromiso de garantir un espazo de lecer e favorecer a conciliación familiar nestes meses estivais, ampliando en 10 as prazas ofertadas respecto do ano pasado e ofrecendo a posibilidade de participar os dous meses de duración do mesmo. Tamén se da maior flexibilidade ás familias, podendo participar por quincenas e non só o mes enteiro, como era habitual, ampliando, deste xeito, as opcións de participación.

 Saúdos, Comunicación Concello de Viveiro