CAMPAMENTO URBANO DE VERÁN

A ALCALDESA DE VIVEIRO VISITA O CAMPAMENTO URBANO DE VERÁN, NO QUE PARTICIPARÁN 140 NENOS E NENAS PARA FACILITAR A CONCILIACIÓN DA VIDA FAMILIAR E LABORAL

Viveiro, 9 de xullo de 2021. A alcaldesa de Viveiro, María Loureiro García, e o concelleiro de Xuventude e Educación, Emilio Villarmea Méndez, visitaron hoxe o Campamento Urbano de Verán, un servizo que iniciou a súa prestación o pasado luns e que se prolongará ata o 27 de agosto de 2021.

Neste campamento ofértanse un total de 140 prazas, distribuídas en dúas quendas, quedando cubertas as 70 prazas ofertadas en cada unha delas.

Ao longo destes dous meses, os nenos e nenas participantes terán a oportunidade de disfrutar das actividades de carácter lúdico programadas, como manualidades, obradoiros de refugallo, xogo cooperativo, actividades deportivas, etc.

“O obxectivo deste campamento é favorecer a conciliación familiar, cubrindo a nivel pedagóxico este tempo de lecer facilitando unha alternativa de ocio saúdable, fomentando o xogo, o deporte e a expresión artística, así como os valores de convivencia e respecto entre iguais”, explica a alcaldesa, María Loureiro.

Saúdos, Comunicación do Concello de Viveiro