FONDO GALEGO DE COOPERACIÓN E SOLIDARIEDADE

O CONCELLO DE VIVEIRO APOIA XUNTO A MÁIS DE 100 CONCELLOS E DEPUTACIÓNS O PLAN DO FONDO GALEGO DE COOPERACIÓN E SOLIDARIEDADE

   Viveiro, 8 de abril de 2022. O Concello de Viveiro súmase ao impulso da cooperación internacional, a Axenda 2030 e á loita contra o cambio climático, apoiando a aprobación do Plan de Actividades 2022 do Fondo Galego de Cooperación e Solidariedade.

Todas as deputacións e concellos socios, incluíndo o Concello de Viveiro, aprobaron o plan de acción da entidade, na Asemblea Xeral celebrada onte en Santiago. A alcaldesa de Viveiro, María Loureiro está presente na Comisión Executiva desta entidade, como representante da Deputación de Lugo. Ademais da rexedora, tamén estivo presente o tenente de alcaldesa, Jesús Fernández, representando ao Concello de Viveiro.

A entidade contará cun orzamento de 486.780 para este ano, que permitirá impulsar actividades baseadas na cooperación internacional, a Axenda 2030 e o cambio climático. Deste modo, promóvense proxectos de cooperación ao desenvolvemento na África lusófona, despregar axuda humanitaria e de emerxencia e apoio nos campamentos de persoas refuxiadas saharauís.

Tamén se realizan programas de cooperación técnica, no que traballadores/as da administración local galega colaboran en proxectos en distintos países. A súa actividade complétase con iniciativas de sensibilización sobre os obxectivos 2030, colaboración con ONG, ou o proxecto europeo People&Planet, que conciencia sobre as consecuencias do cambio climático.

O Fondo Galego de Cooperación e Solidariedade intégrano máis de 100 concellos, xunto coas Deputacións da Coruña, Lugo e Pontevedra. O obxectivo desta entidade, da que o Concello de Viveiro forma parte, é sumar esforzos en materia de cooperación e o desenvolvemento.

Deste modo, realízanse proxectos con impacto nos países do Sur Global, sensibilizando á sociedade galega en prol da solidariedade internacional. Neste ano, a entidade celebra o seu 25 aniversario.

Saúdos,

Comunicación Concello de Viveiro